2025 წლის 24 დეკემბრის საქართველოს მთავრობის №566 დადგენილების საფუძველზე, საჯარო სამართლის იურიდიული პირი – სახელმწიფო უსაფრთხოების სამსახურის სასწავლო ცენტრი გარდაიქმნა სახელმწიფო უსაფრთხოების აკადემიად. აღნიშნული ტრანსფორმაცია ასახავს სახელმწიფოს სტრატეგიულ ხედვას, რომლის მიხედვითაც უსაფრთხოების სფეროში პროფესიული მომზადება უნდა განვითარდეს უმაღლესი განათლების, კვლევისა და ინოვაციის ინტეგრირებული მოდელის საფუძველზე.

მისია
სახელმწიფო უსაფრთხოების აკადემიის მისიაა ეროვნული და საერთაშორისო უსაფრთხოების სისტემებისთვის თანამედროვე სტანდარტებზე დაფუძნებული უმაღლესი განათლების, კვლევისა და სპეციალური პროფესიული პროგრამების განხორციელება. აკადემია ამზადებს ქვეყნისა და სახელმწიფო უსაფრთხოების სისტემისთვის პროფესიონალ, მაღალი ეთიკისა და ლიდერული უნარებით გამორჩეულ და საერთაშორისო დონეზე კონკურენტუნარიან კადრებს - სწავლებისა და კვლევის პროცესში თანამედროვე მეთოდოლოგიების, ინოვაციური ტექნოლოგიების და პრაქტიკაზე ორიენტირებული მიდგომების ინტეგრირებით.

აკადემია უზრუნველყოფს ეროვნული და გლობალური უსაფრთხოების გამოწვევებზე რეაგირებას ცოდნის შექმნის, განვითარების და გაზიარების გზით, რითაც მნიშვნელოვნად უწყობს ხელს ეროვნული უსაფრთხოების სისტემის გაძლიერებასა და მდგრადობას.

ხედვა
სახელმწიფო უსაფრთხოების აკადემია ისწრაფვის გახდეს რეგიონში წამყვანი საგანმანათლებლო და კვლევითი ინსტიტუცია უსაფრთხოების სფეროში, რომელიც გამოირჩევა აკადემიური ხარისხით, ინოვაციური სწავლების მოდელებით, მაღალი პროფესიული ეთიკითა და ეროვნული ინტერესებისადმი ერთგულებით. აკადემია მიზნად ისახავს შექმნას ინტელექტუალური ცენტრი, რომელიც აერთიანებს განათლებას, კვლევასა და პრაქტიკულ გამოცდილებას, აყალიბებს მომავლის ლიდერებს და უზრუნველყოფს უსაფრთხოების სისტემის მდგრად განვითარებას გლობალური გამოწვევების პირობებში.

აკადემიის ღირებულებებს წარმოადგენს :
სახელმწიფოებრივი პასუხისმგებლობა - ეროვნული უსაფრთხოების ინტერესების ერთგულება, ქვეყნის სტრატეგიული პრიორიტეტების გააზრება და უსაფრთხოების სისტემის გაძლიერებაზე ორიენტირებული საქმიანობა.

სწავლა-სწავლების მაღალი ხარისხი - უმაღლესი განათლებისა და კვლევის მაღალი სტანდარტების დაცვა, მტკიცებულებაზე დაფუძნებული სწავლება, ცოდნის შექმნა და კრიტიკული აზროვნების განვითარება.

პროფესიული ეთიკა და კანონის უზენაესობა - მაღალი მორალური სტანდარტების, პატიოსნების, სამსახურებრივი ეთიკისა და სამართლებრივი პრინციპების დაცვა ყველა დონეზე.

ლიდერობა და სტრატეგიული აზროვნება - გადაწყვეტილების მიღების უნარი, პასუხისმგებლიანი ლიდერობის კულტურა და უსაფრთხოების თანამედროვე გამოწვევებზე პროაქტიური რეაგირება.

ინოვაცია და პარტნიორობა - უსაფრთხოების სფეროში თანამედროვე მეთოდებისა და ტექნოლოგიების დანერგვა, ეროვნული და საერთაშორისო აკადემიური და პროფესიული თანამშრომლობის განვითარება.

აკადემიის სტრატეგია ორიენტირებულია შემდეგ ძირითად მიმართულებებზე:

• ინსტიტუციური მდგრადობის უზრუნველყოფა და ეფექტიანი მმართველობის ჩამოყალიბება;
• მაღალი ხარისხის განათლებისა და სწავლა-სწავლების პროცესის განვითარება;
• კვლევითი პოტენციალის გაძლიერება და ცოდნის გენერირება;
• თანამედროვე, უსაფრთხო და ტექნოლოგიურად განვითარებული ინფრასტრუქტურის შექმნა;
• აკადემიის როლის გაძლიერება საზოგადოებისა და უსაფრთხოების სისტემის განვითარების პროცესში.

ამგვარად, აკადემია წარმოადგენს მნიშვნელოვან ინსტიტუციურ პლატფორმას, რომელიც უზრუნველყოფს უსაფრთხოების სფეროში ცოდნის შექმნას, განვითარებასა და გადაცემას, ხელს უწყობს პროფესიული სტანდარტების ამაღლებას და აძლიერებს სახელმწიფოს შესაძლებლობას ეფექტიანად უპასუხოს თანამედროვე და მომავალი უსაფრთხოების გამოწვევებს.